தொப்பை...

வயிற்றுத் தொப்பையும் சர்க்கரை நோய், ரத்த அழுத்தம், முதுகுவலி, மூட்டுவலி, மன அழுத்தம் என பல பிரச்சினைகளுக்கு ஒரு காரணமாக இருப்பதாக  மருத்துவ உலகம் குறிப்பிடிகிறது.

இப்போது ஆண் பெண் என இருபாலருக்கும் வயிற்றுத் தொப்பை இருப்பதை பார்க்கிறோம். ஆண்கள் பீர் தொப்பை என கூறிக்கொண்டாலும், பெண்களுக்கு உள்ள தொப்பையை என்ன சொல்லி அழைக்கிறார்கள் எனத் தெரியவில்லை.  சிலர் ஸ்டைலாக "ஹோர்மோன் பிரச்சினை" என சொல்வது காதில் விழுகிறது. ஆயினும் எப்படிப் பார்த்தாலும் தொப்பை நம் எதிரியே...
ஒரு நாளில் ஏற்படுவதல்ல தொப்பை. பல நாட்கள், பல மாதங்களுக்குப் பின்னே பல காரணங்களினால்  தோன்றுவதாகும் இது. ஆனால் இதைக்குறைக்க நினைப்போர் இதை ஒரே நாளில் போக்கிவிட முடியுமா என வழி தேடுகிறார்கள். சுலபத்தில் வரும் எந்த வழியும் சுகாதாரத்துக்கு உகந்ததல்ல என்பதை எண்ணிப்பார்க்க வேண்டும்.

உடல் ஆரோக்கியத்திற்கு நல்லதல்ல என்பதற்காக நாம் இதில் கொஞ்சம் கவனம் செலுத்தி இளைக்கும் முயற்சிகளை ஆராய்ந்து செயல் படுவதே சிறந்தது.

உடற்பயிற்சியினால் நல்ல பலன் கண்டதாக பலர் சொல்லக் கேட்கிறோம். தினமும் 30 நிமிட விரைவு நடை அல்லது 45 நிமிட மெது நடை என ஒரு மாதத்திற்கு நடந்தால் தொப்பை குறைந்துவிடும் சாத்தியம் அதிகமிருப்பதாக நிபுணர்கள் கூறுகிறார்கள்.

அதோடு உணவிலும் கவனம் தேவை. கொழுப்பு, இனிப்பு, எண்ணெய் போன்றவை குறைந்திருக்கும் உணவே நம் ஆரோக்கியதிற்கு உகந்ததாகும். அதிக அளவில் தண்ணீர் குடிக்கலாம். காய்கறிகளை அதிகம் சேர்த்துக்கொள்ளலாம். பழங்கள் உடல் இளைக்க நமக்கு பெரிதும் உதவும். சாதம், ரொட்டி இவைகளுக்கு பதிலாக பழங்கள் நமக்கு அதிக நன்மைகளைச் செய்கின்றன.